Исроил Мадримовнинг вазнида бирлаштирувчи чемпионлик жанги ўтказилади

Жанг 31 январь санасига белгиланди. Унда биринчи ўрта вазн тоифасида WBO чемпиони, 22 ёшли Зандер Заяс WBA камари соҳиби Абасс Барау ўзаро бирлаштирувчи чемпионлик жангида рингни иккига бўлишади. Чемпионлик жангига Заяснинг она шаҳри Сан-Хуан (Пуэрто-Рико) мезбонлик қилади. 

Истеъдодли Зандер Заяс шу йилнинг июль ойида Хорхе Гарсия Пересни мағлубиятга учратиб, вакант қолган WBO камарини қўлга киритганди. WBO ташкилоти америкалик Себастьян Фундора камардан воз кечганидан кейин ушбу жанги белгилади. Фундора аслида ўз камарини мажбурий даъвогар Заясдан ҳимоя қилиши керак эди. Аммо у Тим Цзюга қарши реванш жанги ўтказишни устун қўйиб, чемпионлик камарини вакант қолдирди. 

"31 январь куни яна бир орзумизни амалга оширамиз. Бу сафар ўз ватанимда жанг қиламан. Икки жаҳон чемпионлик камарларини юртдошларим кўз ўнгида бирлаштирмоқчиман. Биз биргаликда тарих яратамиз. Кўришгунча!", - деди Заяс фаолиятидаги илк бирлаштирувчи жанг ҳақида.

Германиялик 31 ёшли Абасс Барау шу йилнинг август ойида WBA вақтинчалик чемпионлик камарини қўлга киритди. Кейин эса иккинчи ўрта вазн тоифасида янги мутлақ жаҳон чемпиони Теренс Кроуфорд бу камардан расман воз кечди. Натижада Абасс WBA биринчи ўрта вазн тоифасининг тўлақонли чемпионига айланди.

"Зандер - катта истеъдод эгаси ва мен унга жангга рози бўлгани учун муносиб баҳо бераман. Бундай таваккалчиликка ҳамма ҳам боравермайди, айниқса, фаолиятининг ушбу босқичида. Унинг ортида бутун бир мамлакат турибди ва мен буни ҳурмат қиламан. Бу қандай масъулият эканини биламан", - деди Барау.