Истомин Майами ”Мастерс”даги иштирокини ғалаба билан бошлади

Хабар берганимиздек, “Мастерс” туркумига кирувчи мазкур мусобақанинг саралаш баҳсларида мамлакатимизнинг биринчи рақамли теннисчиси Денис Истомин ҳам иштирок этяпти. Турнир ғолиби 1,354,010 АҚШ доллари пул мукофоти ҳамда 1000 рейтинг очкосини қўлга киритади.

Ҳозиргина ҳамюртимиз саралашнинг илк давра учрашувини якунлади. Денис барбадослик Дэриан Кингга қарши кортга чиқди. Икки соату 20 дақиқа давом этган баҳсда Денис 6:4, 3:6, 7:6(3) ҳисобидаги қийин ғалабани қўлга киритди. 

Таққослаш учун, Истомин дунё рейтингида 102, Кинг эса 191-ўринни эгаллаб турибди. Энди теннисчимиз асосий тўрга чиқиш учун словакиялик Лукаш Лацкога қарши кортга чиқади. Лукаш бир неча дақиқа аввал дунёнинг 67-ракеткаси аргентиналик Хуан Лондерони 6:4, 6:1 ҳисобида доғда қолдирди.