Италия президенти келган финалда мезбон теннисчи бош совринга эга чиқди

Ҳал қилувчи финал учрашувида WTA рейтингида 5-ўринни эгаллаб турган италиялик Жасмине Паолини дунёнинг учинчи ракеткаси, америкалик Коко Гоффни ортиқча қийинчиликсиз мағлубиятга учратди - 6/4, 6/2. 

Теннисчиларнинг ўзаро учрашувларидаги ҳисоб мувозанати ҳам тикланди - 2:2. Роппа-роса 90 дақиқа давом этган баҳсда Паолини 5 та брейкни амалга оширди. Ўз ватанидаги муваффақият Паолинига 877,390 евро мукофот пули ҳамда 1000 рейтинг очкоси тақдим этди. Гофф эса 456,735 евро ва 650 очко ишлаб олди. 

Эътиборга молик жиҳати шундаки, Италия президенти Серджо Маттарелла WTA 1000 тоифасига кирувчи ушбу турнирнинг финал учрашувида фахрий меҳмони бўлди. Жасмине эса давлат раҳбарининг ишончини оқлади.