Жаҳон чемпионатининг биринчи кун олтин медаллари Япония ва Италияга кетди

Эркаклар ўртасидаги -60 кг вазн тоифасида япониялик Рюжу Нагаяма фаолиятида илк бор жаҳон чемпионига айланди. У финал беллашувида франциялик Ромен Валадье-Пикарни мағлубиятга учратди. Бронза медаллар мўғулистонлик Йолк Казирбек ҳамда IJF байроғи остида курашаётган россиялик Аюб Блиевга насиб этди. 

Аёллар ўртасидаги -48 кг вазн тоифасида Ассунта Скутто жаҳон чемпиони бўлди. Италиялик дзюдочи финал баҳсида қозоғистонлик Абиба Абужакиновадан устун келди. Испаниялик Лаура Мартинес ва япониялик Кога Вакана бронза медалларига эга чиқишди. Абужакинова 1/2 финалда айнан япон дзюдочини мағлуб этганди.   

Маълумот учун, 1997 йил Тошкентда туғилиб, 2016 йилда Қозоғистонга кўчиб ўтган Абиба учун бу жаҳон чемпионатларининг учинчи медали бўлди. У 2022 йил Тошкент, 2024 йил эса Абу-Дабида ўтказилган жаҳон чемпионатларида бронза медалини қўлга киритганди. Осиё чемпионатларининг икки карра кумуш медали соҳибаси бўлган Абужакинова Ханчжоу-2022 Осиё ўйинларида ҳам вице-чемпионга айланган эди. Абиба 2015 йилда Ўзбекистон терма жамоаси сафида ўсмирлар ўртасида Осиё Кубоги ғолиби бўлган.