Жаҳон чемпионатининг илк куниёқ 4 та медаль қўлга киритдик. Сирожиддинова - Жаҳон чемпиони!

Дунё биринчилигининг биринчи кунги беллашувлари Ўзбекистон ўсмирлар терма жамоаси учун муваффақиятли келди. Аурелио Чиприан-Флис бош мураббийлигидаги кадетларимиз 1 та олтин, 3 та бронза медалига сазовор бўлишди. 

Қувонарлиси, Ирода Сирожиддинова барча рақибаларини мағлубиятга учратиб, ўсмирлар ўртасида Жаҳон чемпионига айланди. -40 кг вазн тоифасида юртимиз шарафини ҳимоя қилган Ирода ҳақиқий маънода ирода намойиш этди. Тўғридан-тўғри иккинчи босқичдан баҳсларга киришган Сирожиддинова озарбайжонлик Сунай Саламова, 1/2 финалда россиялик Эмилия Сайфутдинова ҳамда финал баҳсида қозоғистонлик Адия Жанахметни мағлубиятга учратди. Олис Эквадор заминида Ўзбекистон Республикаси давлат мадҳия янгради. Ирода бир ой олдин Иорданияда ўтган Осиё чемпионатида ҳам олтин медал қўлга киритганди.

Терма жамоамиз аъзоларидан Бобур Юсупов (-55 кг), Алина Колючева (-44 кг) ва Чарос Ҳикматова (-48 кг) жаҳон чемпионатининг бронза медалига сазовор бўлди. Биринчи кунги беллашувлардан сўнг Ўзбекистон терма жамоаси 1 та олтин ва 3 та бронза медали билан 60 давлат орасида умумжамоа ҳисобида 2-ўринни эгаллаб турибди.