Жаҳонгирмирзо олтин, Ихтиёр, Амиржон ва Рустам эса бронза медали учун гиламга чиқади

Хабар берганимиздек, бугун эркин кураш мусобақасида 5 та вазн тоифасида ғолиб ва совриндорлар номи маълум бўлади. Бироз аввал саралаш беллашувлари якунланиб, кечки дастурда медаллар учун гиламга чиқадиган эркин курашчилар номи маълум бўлди. 

Эътиборга молик жиҳати шундаки, бугун баҳсларга киришган 5 курашчимиздан 4 нафарида Осиё чемпионатидан медаль билан қайтиш имконияти бор. 61 кг вазн тоифасида юртимиз шарафини ҳимоя қилаётган Жаҳонгирмирзо Туробов Осиё чемпионлиги учун қозоғистонлик Адлан Аскаровга қарши гиламга чиқади. У чорак финалда япониялик Шоя Шимаэни 5-2, ярим финалда эса кореялик Ким Сунг Гвонни 4-0 ҳисобида енгди. 

Рио-2016 Олимпиадасининг бронза медали совриндори Ихтиёр Наврўзов илк беллашувида мағлубиятга учраган бўлса-да, лекин ўтиш баҳси орқали бронза медали учун курашиш имкониятини қўлга киритди. Ўтиш беллашувида кореялик Ли Сёнг Чулдан устун келган Наврўзов энди бронза медали учун туркманистонлик Атамират Чарлиевга қарши баҳс олиб боради. 

92 кг вазндаги курашчимиз Рустам Шодиев ҳам бронза медали учун курашади. Унинг рақиби ҳиндистонлик Санжит Санжит бўлади. Шодиев чорак финалда қирғизистонлик Чингиз Керимкуловни 9-1 ҳисобида енгиб, ярим финалда эронлик Камран Гасемпурга имкониятни бой бериб қўйганди.

Терма жамоамизнинг энг оғир - 125 кг вазн тоифасидаги вакили Амиржон Нутфуллаев япониялик Таики Ямамотони 11-6, тожикистонлик Рустам Искандарини 19-14 ҳисобида доғда қолдирди. Аммо, ярим финалда мезбон курашчи Олег Болтинга ютқазди. Амиржон Осиё чемпионатининг бронза медали учун мўғулистонлик Худербулга Доржкандга қарши гиламга чиқади.