Жаҳонободда жаҳон чемпионлари беллашди

Қишлоқ фуқоролар йиғини, маҳалла фаоллари ва фахрий полвонлар ташаббуси билан ташкил этилган тадбирда дор ўйинлари билан бирга ҳар доимгидек белбоғли кураш мусобақаси ҳам ўтказилди.

Муросасиз беллашувларда ўсмирлар, ёшлар, катталар ва фахрий полвонлар гиламга чиқиб, ўз маҳоратларини намойиш этдилар. Бу борада энг қизиқарли баҳс кутилганидек, мутлоқ вазнда бўлиб ўтди. Унда маҳаллий полвон, жаҳон чемпиони Зайлобиддин Ортиқов ҳамда Бувайда туманилик жаҳон чемпиони Обидали Мавлонов бош соврин учун беллашди. Мухлисларга олам-олам қувонч бахш этган қизғин курашда Зайлобиддиннинг қўли баланд келди.

- Аввало ташкилотчиларга катта раҳмат. Ҳозирга қадар жуда кўп халқаро мусобақаларда гиламга чиққанман. Лекин ўзим туғилиб ўсган қишлоғим, барча яқинларим олдида ғалаба қозонишнинг гашти барибир бошқача экан, -дейди 2013 йили Қозон шаҳрида бўлиб ўтган Бутунжаҳон Талабалар универсиадаси совриндори Зайлобиддин Ортиқов.

Ўз ўрнида таъкидлаш керак, биргина Жаҳонобод қишлоғидан мустақиллик йилларида ака-ука жаҳон чемпионлари – Зоҳид ва Зайлобиддин Ортиқов, жаҳон чемпионатининг совриндорлари Зоҳид Исмоилов, Бунёд Тўхтасинов, Баҳром Одилов каби полвонлар етишиб чиққан.

Уларнинг устози эса фахрийлар ўртасида жаҳон чемпиони Абдулла Мамаюсупов ҳисобланади. Белбоғли кураш бўйича терма жамоа бош мураббийи, Ўзбекистон Давлат жисмоний тарбия институтининг катта ўқитувчиси Шавкат Мирзақулов ҳам шу қишлоқ фарзанди бўлиб, миллий спортимиз сирларини айнан мана шу  Жаҳонобод қишлоғида ўзлаштирган.