Жалолдинов Жаҳон чемпионати кумуш медали совриндори, Улуғбек Рашитов бугун олтин учун гиламга чиқади

Дунё биринчилигининг навбатдаги куни эркин курашчилар ўзаро беллашишди. Кечаги кун Ўзбекистон терма жамоаси учун омадли келди. -55 кг вазн тоифасида юртимиз шарафини ҳимоя қилган эркин курашчимиз Абдумалик Жалолдинов жаҳон чемпионатининг кумуш медалига сазовор бўлди. Финалгача мағлубиятсиз етиб келган Абдумалик олтин медаль учун кечган муросасиз беллашувда япониялик Жинносуке Оконогига бир очко фарқи билан 4:5 ҳисобида имкониятни бой бериб қўйди. 

Кечаги саралаш баҳсларидан муваффақиятли ўтиб олган эркин курашчиларимиз бугун медаллар учун гиламга чиқишади. -51 кг вазндаги полвонимиз Улуғбек Рашитов финалда АҚШ вакили Самуэль Санчезга қарши олтин медаль учун баҳс олиб боради. Яна икки курашчимиз Миржалол Мукаммилов (-45 кг) ва Фарруҳбек Жуманазаров (-71 кг) бронза медали учун курашади. Уларнинг рақиблари ўтиш беллашувида аниқланади. 

Жаҳон чемпионати медаллари учун кечадиган бугунги беллашувлар бизнинг вақт билан соат 19:00да бошланади.