Жавоҳир ва Гукеш иштирокидаги турнир бошланди. Биринчи кундан сўнг Синдаров тож соҳибидан юқорида!

Анъанавий тарзда рапид ва блиц йўналишлари бўйича ўтказиб келинаётган ушбу нуфузли мусобақада амалдаги Жаҳон тожи соҳиби ҳиндистонлик Гукеш Доммараджу ҳамда чемпионлик учун расмий даъвогар, "Номзодлар турнири" ғолиби Жавоҳир Синдаров ҳам бош соврин учун ўйнаяпти.

Мусобақанинг илк куни шахматчилар рапид йўналишида учта турда ўзаро ҳисоб-китоб қилишди. Жавоҳир Синдаров 1-турда қора доналарда америкалик Ҳанс Мок Ниеманн, 2-турда оқ доналарда польшалик Ян-Криштофф Дуда билан дуранг ўйнади. Учинчи турда эса қора доналарда ўйнаганига қарамай, яна бир мезбон шахматчи Радослав Войташекни мағлубиятга учратди. 

Турнир регламентига кўра, ҳар бир ғалабага 2, дурангга 1 очко берилади. Бугун иккинчи тур доирасида рапид йўналишида яна 3 та тур учрашувлари ўтказилади. Бизнинг вақт билан соат 17:00да бошланадиган 4-турда Синдаров қора доналарда америкалик Уэсли Сога қарши баҳс олиб боради. 

Учинчи турдан сўнг мусобақанинг амалдаги чемпиони словениялик Владимир Федосеев 4 очко билан қўшимча кўрсаткичларга кўра пешқадамлик қилмоқда. Ҳанс Мок Ниеманн, Фабиано Карауна, Уэсли Со ва Жавоҳир Синдаров ҳисобида ҳам 4 очкодан бор. Гукеш Доммараджу 3 очко билан 6-поғонадан жой олган. Радослав Войташек 3 та турда ҳам мағлубият аламини тотиб кўрди. 

Бугун 5-турда Жавоҳир Синдаров ва Гукеш Доммараджу ўзаро тўқнаш келади. Ҳамюртимиз оқ доналарда ўйнайди. Бугунга белгиланган сўнгги 6-турда Жавоҳир қора доналарда франциялик Максим Вашье-Лаграв билан ҳисоб-китоб қилади.