Жейк Пол - Энтони Жошуа жанги расман эълон қилинди

Ушбу қизиқарли жанг 19 декабрь куни АҚШнинг Майами шаҳрида бўлиб ўтади. Оғир вазн тоифасидаги жанг кўпчилик кутгандек кўргазмали мақомда эмас, балки профессионал, барча қоидалар асосида ўтказилади. Жанг Netflix платформасида жонли эфирда намойиш этилади.

Боксчиларнинг жамоалари музокара олиб бораётгани ва келишувга яқинлиги бир кун аввал маълум бўлганди. Шу йилнинг ёзида томонлар ушбу жангни ташкил этишга уриниб кўришган, бироқ баҳсни трансляция қилиш ҳуқуқи бўйича келиша олишмаганди.

Аслида Жейк Пол эртага тонг саҳарда Жервонта Дэвисга қарши рингга кўтарилиши керак эди. Аммо енгил вазн тоифасида амалдаги жаҳон чемпиони юридик муаммолар туфайли жангдан "ечилганди".

Маълумот учун, 36 ёшли Энтони Жошуа ўтган йилнинг сентябрь ойидан бери рингга чиқмаган. Ўшанда у оғир вазн тоифасида IBF чемпионлик камари учун кечган жангда ватандоши Даниэль Дюбуага бешинчи раундда нокаут билан ютқазганди. 27 ёшли Жейк Пол эса шу ёзда ҳакамларнинг якдил қарори билан Хулио Сезар Чавесни мағлуб этганди.