Жейк Полнинг MVP компанияси PFL лигасини сотиб олмоқда

"Most Valuable Promotions" (MVP) промоутерлик компанияси ва PFL томонидан эълон қилинган пресс-релизда янги бирлашган ташкилот тузилгани маълум қилинди. У MVP номи остида фаолият юритиб, "жаҳон даражасидаги бокс ва аралаш яккакурашларни бирлаштиради ҳамда спортчилар манфаатларига йўналтирилади".

"Яккакурашлар келажаги етиб келди. MVP`га хуш келибсиз", — дейилади пресс-релизда.

Кутилишича, келгуси тақвим йил бошига келиб, PFL лигаси ўзининг ҳозирги кўринишида янги MVP ташкилотига тўлиқ интеграция қилинади ва унинг бренди муомаладан чиқарилади.

Компанияни Жейк Пол, унинг бизнес ҳамкори Накиса Бидариан, шунингдек, PFL бош директори Жон Мартин бошқаради. Мартин бирлашган компания раҳбари лавозимини эгаллайди ва директорлар кенгашига киради. Бидариан эса бокс йўналиши ва тадбирларни ўтказишга масъул бўлади.

Эълон қилинган маълумотлар, шунингдек, ижтимоий тармоқлардаги пресс-релизнинг визуал дизайни гап айнан PFL лигасининг ютилиши (сотиб олиниши) ҳақида кетаётганига шубҳа қолдирмайди.

Жорий йилнинг май ойида MVP промоутерлик компанияси ўзининг илк аралаш яккакурашлар турнирини ўтказган эди. Унда асосий жанг сифатида аёллар ўртасида ярим енгил вазн тоифасида Ронда Роузи ва Жина Карано ўртасидаги баҳс бўлиб ўтди. Нетфлих орқали трансляция қилинган тадбир муваффақиятли деб топилди ва MVP раҳбарларининг сўзларига кўра, UFC билан жиддий рақобат учун асос бўлди.

Ушбу ҳафта PFL лигаси Нью-Йоркда ўзининг сўнгги турнирларидан бирини ўтказади. Турнирнинг марказий жангида россиялик Усман Нурмагомедов енгил вазн тоифасидаги чемпионлик камарини америкалик Арчи Колганга қарши ҳимоя қилади.