12 окт 10:05
Янгиликлар

Бокс/ММА

Жейрон Эннис иштирокидаги жанг биринчи раунддаёқ тугади

Бугун тонг саҳарда АҚШнинг Филадельфиясида профессионал бокс турнири бўлиб ўтди.

Оқшомнинг асосий жангида яримўрта вазнда собиқ IBF чемпиони Жейрон Эннис профессионал фаолиятидаги 35-ғалабасини қўлга киритди. Америкалик 28 ёшли Эннис бугун биринчи ўрта вазн тоифасида дебют қилди. Унинг рақиби анголалик Уисма Лима бўлди.

Жанг биринчи раунддаёқ якунланди. Эннис аввалига Уисмани нокдаун ҳолатига тушириб қўйди. Кейин эса кетма-кет кучли зарбалар эвазига рақибини техник нокаутга учратди. Жейрон мағлубиятсиз одимини давом эттирди. Яқинда унинг промоутери Эдди Хирн асосий мақсади мижозига P4P рейтинги етакчиси Теренс Кроуфорд билан жангни ташкил қилиб бериш эканини айтган эди.