Жисмоний тарбия ва спорт вазирлиги ишчи гуруҳи Қорақалпоғистондаги фаолиятини бошлади

Шу кунларда Ўзбекистон Республикаси Жисмоний тарбия ва спорт вазирлиги томонидан тузилган ишчи гуруҳ Қорақалпоғистон Республикасида жисмоний тарбия ва спортни янада оммалаштириш, бу борада ҳудудлардаги мавжуд шарт-шароитлар билан яқиндан танишиш ва иш жараёнларини ташкил этишда услубий ёрдам кўрсатиш мақсадида ҳудудда ўз иш фаолиятини бошлади.

Кечадан иш фаолиятига киришган ишчи гуруҳнинг бир гуруҳ вакиллари Қорақалпоғистоннинг Хўжайли туманидаги Болалар-ўсмирлар спорт мактаби ва унга қарашли спорт иншоотларининг бугунги ҳолатини ўрганишдан бошлади.

Ҳозирда бу спорт таълим муассасасида карантиндан кейинги иш фаолияти қайта тикланган бўлиб, бир қатор спорт турлари бўйича ёш спортчиларни машғулотларни давом эттиришмоқда.

Ишчи гуруҳ вакилларининг Қорақалпоғистон Республикасига хизмат сафари давомида ҳудудларда спорт мактаблари ва спорт таълим муассасаларининг кадрлари салоҳияти ва тренерларга бўлган эҳтиёжи ҳамда уни бартараф этиш бўйича мақсадли қабул бўйича таклифлари ўрганиб чиқилмоқда. Шунингдек, ҳудудларнинг спорт турларига ихтисослашуви, моддий техник базасининг ҳолатини янада ривожлантириш, спорт инвентарлари сони ва бугунги ҳолати, терма жамоа аъзоларини шакллантириш масалалари бўйича ишчи гуруҳ туман масъулларига яқиндан кўмаклашмоқда.

Бундан ташқари, ҳудудлардаги спорт мактаблари ва спорт таълим муассасаларининг бўш ер майдонлари ва улардан мақсадли фойдаланиш режаси бўйича тадбиркорлар томонидан киритилаётган таклифлар ҳам кўриб чиқилиб, икки томонлама манфаатли ҳамкорликни йўлга қўйиш бўйича тадбиркорлар билан юзма-юз очиқ суҳбатлар ўтказилмоқда.

Шунингдек, Қорақалпоғистон Республикаси бўйлаб ташкил этилаётган жисмоний тарбия ва спорт тадбирларини республика бўйлаб оммавий ахборот воситаларида кенг ёритиб бориш жараёнлари ўрганилиб, бу бўйича амалий кўмак бериш масаласи тегишлича ҳал этилмоқда.

Якунда республика спортининг бугунги ҳолатини ўрганган ҳолда, ҳудудлардаги таклиф ва эҳтиёжлардан келиб чиқиб, ишчи гуруҳ томонидан Қорақалпоғистон Республикасида спортни янада оммалаштириш ва ривожлантириш бўйича махсус дастур ишлаб чиқилади.