26 сен 11:55
Янгиликлар

Теннис

Жўрабек биринчи ракеткадан сўнг яна бир кучли рақибни таслим этди

Қозоғистоннинг Алмати шаҳрида теннис бўйича "Фьючерс" туркумига кирувчи турнир давом этмоқда.

Соврин жамғармаси 25 000 АҚШ долларини ташкил этувчи ушбу мусобақада ўзбекистонлик теннисчилар ҳам иштирок этаётган эди. Улардан Марк Трякшин ва Жўрабек Каримовгина бош соврин учун курашни давом эттиряпти.

Жўрабек биринчи даврада турнирнинг биринчи ракеткаси, швейцариялик Марк-Андреа Хьюслерни 6:4, 7:6(6) ҳисобида таслим этган эди. Бироз аввал якунланган ва 55 дақиқа давом этган иккинчи босқич учрашувида эса у яна бир кучли рақиб, грузиялик Георге Цивадзедан 6:1, 6:2 ҳисобида устун келди.

Жўрабек Каримовнинг чорак финалдаги рақиби бироздан сўнг аниқланади. Иккинчи даврадан ўрин олган ўзбекистонлик Марк Трякшин ҳамда турнирнинг бешинчи ракеткаси, россиялик Коснтантин Кравчун учрашуви ғолиб чорак финалда Жўрабекка рақиб бўлади.