Жордан Барроуз RAF билан шартнома имзолаб, Махачев ва Царукян билан бир кечада жанг қилмоқчи эканини айтди

37 ёшли Барроуз 2012 йилги Олимпия ўйинлари чемпиони ҳисобланади. Шунингдек, у 74 ва 79 кг вазн тоифаларида олти карра жаҳон чемпиони бўлган. Америкалик спортчи Олимпия ўйинлари ва жаҳон чемпионатларида қўлга киритган умумий олтин медаллари сони бўйича АҚШ рекордчиси саналади ҳамда эркин кураш тарихидаги энг буюк полвонлардан бири сифатида эътироф этилади.

Узоқ вақт давомида Барроузнинг аралаш жанг санъатларига (ММА) ўтиши ҳақида турли миш-мишлар тарқалган эди. Бироқ у бу ғоядан воз кечди ва эркин кураш бўйича Real American Freestyle Лигаси билан келишувга эришди. 

Маълум қилинишича, машҳур курашчи RAF лигасидаги дебют жангини 22 август куни бўлиб ўтадиган RAF 12 турнирида ўтказади. У ижтимоий тармоқлардаги саҳифалари орқали Ислам Махачев ва Арман Царукян билан бир оқшомда жанг қилиш истагида эканини ёзган.