Жошуа Ван - Александр Пантожа реванш жанги ўтказилади

Ушбу чемпионлик жанги 19 сентябрь куни Лос-Анжелес шаҳрида бўлиб ўтадиган UFC 331 турнири кардига киритилади. Жангнинг ўтказилиши ҳақида вазиятга яқин манбалар хабар берди, бу билан америкалик мураббий Эрик Никсикнинг ўтган ҳафта эълон қилган маълумотлари тасдиқланди.

Александр Пантожа ва Жошуа Ван ўртасидаги биринчи жанг ўтган йилнинг декабрь ойида бўлиб ўтганди. Ўшанда октагонга дивизионнинг доминант чемпиони сифатида чиққан бразилиялик аралаш яккакураш устаси муваффақиятсиз йиқилиши натижасида тирсагини чиқариб олган ва жангни давом эттира олмаганди. Натижада мьянмалик даъвогар ғолиб дея эълон қилинганди. 

Пантожа операциясиз тикланаётган бир пайтда, Ван жорий йилнинг май ойида япониялик Тацуро Тайрани бешинчи раундда техник нокаут эвазига мағлуб этиб, чемпионлик камарини муваффақиятли ҳимоя қилган эди.