Жошуанинг промоутери Пол билан жанг саҳналаштирилгани ҳақидаги айбловларга жавоб қайтарди

Жанг 20 декабрь куни Майами шаҳрида (Флорида, АҚШ) бўлиб ўтган ва Жошуанинг олтинчи раунддаги нокаутли ғалабаси билан якунланган.

"Ҳозир ҳам одамлар: “Ҳа, бу албатта келишилган жанг эди”, деб гапиришяпти. Бугун битта йигит менинг постларимдан бирига изоҳ қолдирди: “Бу аниқ саҳналаштирилган эди”, деди. Мен унга жавоб бердим: “Сен Жейкнинг жағини икки жойдан синдириб олганини тушундингми?”

Эҳтимол, Жейк умуман бошқа ҳеч қачон бокс туша олмаслиги ҳам мумкин. Бу ҳақда деярли ҳеч ким гапирмаяпти. Одамлар Жейкка шунчаки сим қўйишади, бир неча винт қадашади ва у давом этади, деб ўйлашади. Лекин кўплаб жангчилар жағини синдиргандан кейин ҳеч қачон рингга қайтмаган.

Ҳаммаси 100 фоиз ҳақиқий эди. Ҳеч қандай стратегия, келишув ёки сценарий бўлмаган. Энтони имкони борича эрта аниқ зарба беришни хоҳлаган. Афсуски, буни у фақат олтинчи раундда уддалади.

Биз Жейк бундай бўлишини истамагандик. Биз жангда ғалаба қозонишни ва уни якунлашни хоҳладик, холос. Барча таваккалчиликни у рингда ўзи зиммасига олди. Унинг тикланишига умид қиламиз", — деди Хирн.