Жозе Альдо бир қарорга келди - афсона нуқта қўйди!

Бразилиялик аралаш яккакураш устаси ММАдаги фаолиятини расман якунлаганини маълум қилди. Бир ҳафта олдин Жозе Альдо эшикни ёпмаётгани, ҳали октагонга қайтиши мумкинлигини айтганди.  

У Рио-де-Жанейродаги "Nova Uniao" машғулот базасида ўз оила аъзолари даврасида катта спортдан бутунлай кетганини эълон қилди. Шу ернинг ўзида расмий матбуот анжумани ҳам ўтказилди. 

"Қафас ҳамиша менинг манзилим, жанглар эса – менинг ҳаётим бўлган. Бугун мен бу йўлни хотиржам қалб билан якунлаяпман. Бошқа қайтмайман, чунки ўз миссиямни шу ерга келганда тугатдим. Вазифа қон эвазига, лекин интизом ва шараф билан уддаланди. Ўтган йиллар давомида мен умримнинг маълум бир қисмини шу спортга бағишладим. Энди бор эътиборимни оиламга бағишлайман. Ҳаётдан завқ олиб яшашда давом этаман. Бизнинг яккакурашдаги ҳаёт йўлини бошлаётганларга ёрдам бераман. Шунча йил мобайнида ёнимда бўлган барчага ўз раҳматимни айтаман. Нимага эришган бўлсам, бари сиз туфайли", – деди Альдо.

Маълумот учун, шу йил сентябрь ойида 39 ёшга тўладиган Жозе Альдо ММАдаги фаолияти давомида жами 42 та жанг ўтказган бўлиб, 32 ғалаба ва 10 та мағлубият қайд этган. Ғалабаларининг тенг ярмини муддатидан аввал якунлаган. Сўнгги жангини 11 май куни UFC 315 турнири доирасида Эйеманн Захабига қарши ўтказиб, очколар ҳисобига кўра имониятни бой бериб қўйганди.