Журналистлар бадминтонда маҳоратларини синаб кўришди ФОТОРЕПОРТАЖ

Туризм ва спорт вазирлиги томонидан ташкил этилган мусобақа журналистлар ва соҳада хизмат қилаётган ходимларни соғлом турмуш тарзига жалб этиш, уларни жисмоний фаолликка чақиришга қаратилганлиги билан аҳамиятли бўлди.

Муросасиз беллашувларга Туризм ва спорт вазири Азиз Абдуҳакимов ҳамда Ўзбекистон журналистлари ижодий уюшмаси раиси Олимжон Ўсаров ўртасидаги рамзий ўйин билан старт берилди.

– Журналистлар ўртасидаги бу галги баҳсларнинг олдингилардан фарқли жиҳати, унда иштирокчилар ёш тоифаси бўйича беллашишди. Яъни 40 ёшгача бўлган ва ундан катта ёшлилар. Бу эса мусобақанинг ҳар жиҳатдан адолатли ва шаффоф ўтишини таъминлади, – дейди Туризм ва спорт вазирлиги бўлим бошлиғи Зарина Абдуллаева.

Телевидение, радио, газета, ахборот агентлиги, интернет журналистикаси, турли корхона-ташкилотларнинг матбуот хизмати вакилларининг 70 нафарга яқини “Янги йилга спорт билан!” шиори остида ташкил этилган мусобақада ўз омадини синаб кўришди.

Қизиқарли ва дўстона ўтган баҳсларда М.Эрматова, Ҳ.Маннапова, С.Ниёзов ва Б.Мақсудов яккалик баҳсларда ғолиб чиққан бўлса, А.Муроджонов/М.Эрматова жуфтлик мусобақаларида бош совринга эга чиқишди.

Эътиборлиси, ғолиблик шоҳсупасига кўтарилган журналист ва соҳа ходимлари мусобақани соврин – вилосапидда тарк этадиган бўлишди.

Бундан ташқари ғолиб ва совриндорлар медаль, диплом ҳамда спорт анжомлари билан тақдирланишди. Шунингдек, яккалик баҳсларида ғолибликни қўлга киритган иштирокчиларга Янги йил совғаси – “Тибет” дам олиш масканига оилавий дам олиш учун ваучерлар тақдим этилди.

Муҳими, соҳа ходимларининг бир куни саломатлик машғулотларига бағишланди, соғликлари мустаҳкамланди.

Суратлар муаллифи - Алимурод МАМАДАМИНОВ, ўз мухбиримиз