Кафолатланган гонорари 32 млн доллар бўлган жанг иштирокчилари тарозига чиқишди

Оқшом доирасида америкалик боксчи-блогер Жейк Пол британиялик профессионал боксчи Томми Фьюрига қарши рингга кўтарилади. Ҳар икки боксчи тарозидан ўтиш маросимида ҳозир бўлишди ва ҳар иккаласи ҳам белгиланган вазн меъёрини бажаришди. 

Пол 83.3 килограмм (183.6 фунт), Фьюри эса 83.7 килограмм (184.5 фунт) тош босди. Боксчилар 30 сониялик кўз уриштириш маросимида ҳам юзма-юз келишди. Кутилганидек, бу жараён шунчаки сокин ўтмади. Британиялик боксчининг асаблари дош беролмади ва блогерни туртиб юборди.  

"Унинг вақти тугади. У тамом бўлади. Жейк Пол бошқа бокс жангларида рингга чиқмайди. Уни узоғи билан тўрт раундда йўқ қиламан", - деди Фьюри.

"У катта акаси сингари катта гапиришни яхши кўради. Лекин унинг асабийлашаётгани ва қалтираб туришига ҳамма гувоҳ бўлди. Мен хотиржамман. Менга бундай ўйинлар ярашмайди – мен Огайо штатининг Кливленд шаҳридан келган ҳақиқий ваҳшийман. Асл қотил менман", – дея Фьюрининг гапига жавоб қайтарган Пол. 

Аввалроқ, жанг 8 раунд этиб белгиланган, Жейк Пол 25 миллион доллар, Томми Фьюри эса 7 миллион доллар кафолатланган гонорарга эга бўлиши айтилган эди.