Камарга яқин турган Муҳаммад Шеховнинг навбатдаги жанги тасдиқланди + ПОСТЕР

Боксчимиз 5 июль куни Россиялик Екатеринбург шаҳрида RCC Boxing Promotions компанияси томонидан ташкил этиладиган проф бокс оқшомида аргентиналик Родриго Руизга қарши жанг ўтказади. Ғалаба қозонадиган боксчи иккинчи энг енгил вазн (55,3 кг) тоифаси WBA рейтингида иккинчи ўринга кўтарилиб олади. 

Муҳаммад Шехов (16-0-1, 4 KOs)нинг рақиби  Родриго Фабиан Руиз (22-0, 16 KOs) проф фаолияти давомида ҳали мағлубият ва дуранг қайд этмаган. Ғалабали якунланган 22 та жангининг 16 тасини муддатидан аввал ўз фойдасига ҳал қилган. Дмитрий Биволни дўсти ва жамоадоши бўлган Шехов ҳам ҳали мағлубиятга учрамаган. У WBO ва WBA йўналишлари рейтингида Топ-10`таликда бормоқда. 

Шунингдек, Муҳаммад IBF Inter-Continental камари соҳиби ҳам ҳисобланади. Бу камарни у ўтган йилнинг сентябрь ойида Челябинск шаҳрида ўтган RCC Boxing Promotions шоуси доирасида қўлга киритганди. Яқинда Венгрия пойтахти Будапешт шаҳрида ўтган бокс турнирида эса лотинамерикалик даъвогар Орландо Моралесни мағлубиятга учратган эди.  

Қизиғи, бу вазнда Муроджон Аҳмадалиев мутлақ жаҳон чемпионлиги учун ҳаракат қилмоқда ва бу орзусига 14 сентябрь куни эришиши мумкин. Аргентиналик Родриго Фабиан Руиз WBA ва IBF йўналишлари рейтингида Топ-15`дан жой олган. Руиз 10 маротаба Жанубий Америка қитъаси чемпионлигини ҳимоя қилган.