Камилла Раҳимова ва Мария Тимофеева финал учрашувини ўтказди

Афсуски, ҳар икки теннис маликамиз асосий тўрга йўлланма берган саралашнинг финал учрашувида мағлубият аламини тотиб кўрди. Улар 2026 йилнинг илк WTA турнирида муваффақиятли старт олганди. Раҳимова 1/2 финалда австралиялик Астра Шармани 6/2, 6/2, Тимофеева дунёнинг 70-ракеткаси, саралашда биринчи рақам остида таснифланган хорватиялик Антониа Рузични 7/5, 6/4 ҳисобида мағлубиятга учратган эди. 

Турнирда саккизинчи рақам остида ҳаракат қилган Раҳимова бироз аввал якунига етган ва асосий тўрга йўлланма берган саралашнинг финал баҳсида мусобақанинг учинчи ракеткаси, словакиялик Ребекка Шрамковага деярли қаршиликсиз ютқазди - 1/6, 2/6. WTA рейтингида 143-ўринни эгаллаб турган Тимофеева эса беларуслик Александра Сасновичга 2/6, 6/3, 2/6 ҳисобида имкониятни бой берди ва турнирдаги иштирокини якунлади.