Каратэчиларимиз Португалиядаги Премьер-Лига мусобақасига йўл олишмоқда

Вакилларимиз 30 апрель – 2 май кунлари Лиссабон шаҳрида бўлиб ўтадиган навбатдаги Премьер-лига мусобақасида иштирок этишади. Бугун МОҚ раиси Рустам Шоабдураҳмонов ва унинг ўринбосари Шерзод Ташматов сафар олдидан терма жамоамиз вакиллари билан учрашди. Суҳбат давомида МОҚ раиси каратэчиларимизнинг кайфияти ва ҳолати ҳақида суҳбатлашди. 

“Лицензион мусобақага ҳам оз вақт қолди. Бу турнир Парижда ўтадиган мусобақага тайёргарлик бўлади. Жанг пайти ўзингизда кичик жароҳат сезсангиз, дарҳол мусобақадаги иштирокни тўхтатинг. Асосий эътиборимиз Олимпиадага тўғридан тўғри йўлланма берадиган мусобақага қаратилади. Бу борада ҳукуматимиз барча керакли шароитларни яратиб бермоқда. Биз бунга ўз ғалабаларимиз билан жавоб беришимиз лозим. Тайёргарлик билан боғлиқ қандай шароитлар керак бўлса, биз яратиб берамиз”, – деди Рустам Шоабдураҳмонов.

Ташриф давомида МОҚ раҳбарияти каратэчиларимиз истиқомат қилаётган меҳмонхонанинг шароитларини кўриб чиқди. Якунда мутасаддилар спортчиларимизга омад тилаб, сафар давомида саломатликларига эътиборли бўлишларини таъкидлашди.

Маълумот учун, Лиссабон турнирида юртимиз шарафини Садриддин Сайматов (-60 кг), Достон Отаболаев (-75 кг), Баҳринисо Бабаева (-50 кг) ва Севинч Раҳимова (-55 кг) ҳимоя қилишади. Июнь ойида Париж шаҳрида каратэ бўйича Токио-2020 Олимпиадасига тўғридан тўғри йўлланма берувчи мусбақа бўлиб ўтиши режалаштирилган. Лиссабон турнири мазкур мусобақага тайёргарликнинг сўнгги босқичи вазифасини ўтаб беради.