Каратэчиларимиз сўнгги ўқув-машғулот йиғинини ўтказмоқда

Мураббийлар Дилноза Бакирова ҳамда Ўктам Бекпўлатовлар бошчилигида ўтказилаётган ушбу ўқув-машғулот йиғинида барча тажрибали терма жамоа аъзолари иштирок этмоқда. Албатта, яратиб берилаётган шароитлар ва эътиборга каратэчиларимиз ўзларининг ижобий натижалари билан муносиб жавоб беришади, деган умиддамиз.

Ўзбекистон Миллий Олимпия қўмитаси ҳамда Спорт яккакурашлари бўйича Республика олий спорт маҳорати мактаби томонидан ташкил этилган ушбу йиғин қизғин давом этмоқда. Куни кеча Миллий Олимпия қўмитаси ходими Ҳикмат Тошматов ҳамда Спорт яккакурашлари бўйича Республика олий спорт маҳорати мактаби директори Баҳодир Маматназаров машғулотларга ташриф буюриб, терма жамоа аъзолари билан учрашди ва улар билан ўзаро суҳбат олиб борди.

Бир сўз билан айтганда, спортчиларимизга ўзига хос мотивация бериш билан бирга шароитлар билан яқиндан танишиб чиқди. Шубҳасиз, бундай эътибор терма жамоамиз аъзоларига руҳан далда беради.

Ушбу йиғинга 16 нафар спортчи жалб этилган бўлиб, машғулотларни уч нафар мураббий олиб бормоқда.

Эслатиб ўтамиз, Франциядаги якуний лицензион турнирда ўз вазн тоифаларида 1-3-ўринни эгаллаган спортчилар Токио олимпиадаси йўлланмаларини қўлга киритишади.