Кевин Дюрант фаолиятини "Нетс"да давом эттиради

“Кеча биз Стив Нэш билан Лос-Анжелесда Кевин Дюрант ва Рич Клейман билан учрашдик. Ҳамкорлигимизни давом эттиришга келишиб олдик. Биз фақат баскетболга эътибор қаратганмиз. Олдимизда ягона мақсад бор - "Бруклин" учун чемпионликни қўлга киритадиган жамоа қуриш", - деди клуб бош директори Шон Маркс баёнотида.

Инсайдерларнинг хабар беришича, учрашувда "Нетс" эгалари Жозеф Цай ва Клара Ву Цай ҳам иштирок этган. Дюрант аввалроқ "Нетс"га ультиматум қўйиб, уни бошқа клубга алмаштиришни ёки бош директор Шон Маркс ва бош мураббий Стив Нэшни кетишини талаб қилганди.

Маълум бўлишича, учаласи ҳам "Нетс"да қолади. "Бруклин" энди баскетболчини алмаштириш бўйича музокаралар олиб бормаяпти.

Эслатиб ўтамиз, Дюрантнинг "Нетс" билан шартномаси яна тўрт мавсумга мўлжалланган.