Ковалев ва Альварес тарозига чиқишди, эртага чемпионлик жанги

Оқшомнинг марказий жангида ўзбекистонлик мураббий Аброр Турсунпўлатов қўл остида шуғулланаётган Сергей Ковалёв (32-2-1, 28КО) ўзига тегишли бўлган ярим оғир вазн тоифасидаги WBO чемпионлик камарини ҳимоя қилади. 

Россиялик 35 ёшли чемпион мағлубият нималигини билмай келаётган колумбиялик 34 ёшли Элейдер Альварес (23-0, 11КО)га қарши рингга кўтарилади. Бугун одатга кўра боксчилар тарозидан ўтиш маросимида иштирок этишди. 

Ҳар икки боксчи ҳам белгилангани вазн 175 фунт (79,4 кг) меъёрини муваффақиятли бажаришди. Ковалев — 174 фунт (78,9 кг), Альварес эса — 174,4 фунт (79,1 кг) тош босди. 

Кечанинг яна бир қизиқарли жангида ярим оғир вазнда WBA чемпиони россиялик 27 ёшли Дмитрий Бивол (13-0, 11КО) малавийлик 31 ёшли Айзек Чилемба (25-5-2, 10КО) билан тўқнаш келади. Биволнинг вазни 174,6 фунт (79,2 кг), Чилембанинг оғирлиги эса 175 фунт (79,4 кг) экани маълум бўлди.