Крис Вайдмен сафдан чиқди, Андерсон Сильвага янги рақиб берилди

Турнир доирасида UFC собиқ чемпионлари Тайрон Вудли ва Андерсон Сильва ўртасидаги жанг ҳам бўлиб ўтади. Вудли жароҳат олиб, жангни тарк этган Крис Вайдменнинг ўрнига рингга чиқади. Америкалик ва бразилиялик ўртасидаги олти раундлик жанг профессионал мақомга эга бўлади ва 195 фунт (88,45 кг) вазн тоифасида ўтказилади.

"Ўзгаришлар шунчаки юз бермаётганига ишонаман. Мен ўз ишимни яхши бажариш, рақибимни ҳурмат қилиш ва бокс оламига тўлиқ ҳурмат кўрсатишга эътибор қаратяпман", - дея изоҳ қолдирган Сильва янгиликка.

Маълумот учун, 43 ёшли Тайрон Вудли 2021 йилда Жейк Полга икки марта ютқазганди. Тайрон блогерга қарши илк жангда ҳакамларнинг айри қарори билан ютқазган бўлса, реванш жангида нокаут билан мағлубиятга учраган эди. У ўшандан бери мусобақаларда иштирок этмаган.

Роппа-роса 50 ёшли Андерсон Сильва эса сўнгги бор ўтган йилнинг июнь ойида рингга кўтарилиб, азалий рақиби Чел Сонненга қарши кўргазмали жангни дуранг натижа билан якунлаган эди. Бразилияликнинг профессионал боксдаги рекорди учта ғалаба ва иккита мағлубиятдан иборат. Мағлубиятларидан бирини 2022 йилда Жейк Полдан қабул қилиб олган.