17 сен 11:20
Янгиликлар

Теннис

Крюгер фаолиятидаги илк совринни Осакада қўлга киритди

Бугун Япониянинг Осака шаҳрида теннис бўйича WTA турнири якунига етди.

Ҳал қилувчи финал учрашувида WTA рейтингида 123-поғонада бораётган америкалик Эшлин Крюгер дунёнинг 35-ракеткаси, хитойлик Чжу Линга қарши кортга чиқди ва кучли рақибасини 6/3, 7/6(6) ҳисобида мағлубиятга учратди. Бу Крюгер учун фаолиятидаги биринчи соврин бўлди.

Бу теннисчиларнинг ўзаро ўтказган илк учрашуви эди. Тўқсон саккиз дақиқа давом этган баҳсда Крюгер 7, Чжу Линь 3 та эйс зарбани амалга оширган. Иккала теннисчи ҳам 3 тадан қўшхатога йўл қўйди.

Kinoshita Group Japan Open Tennis Championships турниридаги муваффақиятли иштирок америкалик теннисчига 280 рейтинг очкоси ҳамда 34,228 доллар мукофот пули келтирди. Крюгер эртага эълон қилинадиган рейтингда Топ-100`таликда дебют қилади.