Кучли учликка кирган Воҳидов жаҳон Кубоги йўлланмасини қўлга киритди, Гулруҳбегим ва бошқа етакчиларимиз миссияни бажара олишмади

Мукофот жамғармаси 80 000 АҚШ долларини ташкил этган мазкур мусобақада Ўзбекистон терма жамоаси ҳам катта таркибда қатнашди. Осиё чемпионати шу йил ўтказиладиган жаҳон Кубогига йўлланма бериши билан ҳам аҳамиятли эди. Ушбу йўлланмага терма жамоамиз аъзоларидан биргина Шамсиддин Воҳидов эга чиқди. 

Осиё чемпионатининг сўнгги 9-турида икки гроссмейстеримиз Шамсиддин Воҳидов (2641) қитъа биринчилигида қатнашган биринчи рақамли шахматчимиз Нодирбек Якуббоев (2665) ўзаро тўқнаш келишди. Ўзбекча дербида дуранг натижа қайд этилди. Тўққиз имкониятдан 6,5 очко тўплаган Шамсиддин Воҳидов учинчи ўрин соҳиби сифатида бронза медали билан бирга жаҳон Кубоги йўлланмасини ҳам қўлга киритди. Шунингдек, у 6000 АҚШ доллари миқдоридаги мукофот пулига ҳам эга чиқди. Нодирбек Якуббоев 6 очко билан қўшимча кўрсаткичларга кўра 15-ўринни эгаллади. Бу поғона учун 500 АҚШ доллари тақдим этилди. 

Қизларимиздан энг яхши натижага Афруза Ҳамдамова эришди. Ёшлар ўртасида икки карра жаҳон чемпиони cўнгги 9-турда россиялик Мария Якимовани мағлубиятга учратди. Тўққиз имкониятдан 6,5 очко тўплаган Ҳамдамова 8-ўринни банд этди. Афсуски, Гулруҳбегим Тоҳиржонова Осиё чемпиони бўлиш имкониятидан фойдалана олмади. У 9-турда қора доналарда ўзи сингари 6 очкога эга бўлиб турган хитойлик Сонг Юсинга ютқазиб қўйди. Сонг ушбу ғалабаси эвазига 7 очко билан Осиё чемпионига айланди. Гулруҳбегим 6 очко жамғарган ҳолда 10-ўрин билан кифояланди. Ҳамдамова 800, Тоҳиржонова 600 АҚШ долларига эга бўлган.