Кураш бўйича 2024 йилнинг энг яхшилари эътироф этилди

Ота-боболаримиздан мерос улмас қадриятимизнинг спорт тури мақомига кўтарилиши асносида 2025 йилги Ислом бирдамлик ўйинлари каби нуфузли спорт инфратузилмасидан жой олишида, дунёнинг ўнлаб мамлакатларида турли халқаро кураш мусобақалари ва семинарлари ташкил этилишида Ўзбекистон кураш федерацияси мутахассислари, мураббийлари, экспертларининг алоҳида ўрни бўлганлиги бор гап.

Куни кеча Ўзбекистон кураш федерацияси 2024 йил мобайнидага халқаро мусобақалар, турнирлар ва чемпионатлар сарҳисобига кўра, йилнинг энг яхшилари рўйхатини эълон қилди.

Унга кўра, жорий йил Эрон Ислом Республикасининг Теҳрон шаҳрида ўтказилган Осиё чемпионатида, Қозоғистоннинг Остона шаҳрида ўтган Бутун жаҳон кўчманчилар ўйинларида, Жаҳон профессионаллар серияси халқаро турнирида ғолибликка эришган Отабек Ҳасанов йил курашчиси номига лойиқ сазовор бўлган бўлса, фахрийлар ўртасидаги республика турнирида, “Прокурор полвони” мусобақасида, Мўғулистон давлатида фахрийлар ўртасида ўтказилган Жаҳон чемпионатида ғолиблик шоҳсупасига кўтарилган Улуғбек Исмоилов йилнинг фахрий курашчиси номига лойиқ кўрилди.

Шунингдек, қатор турнирлар, чемпионатлар ғолиби Ҳилола Ортиқбоева йил аёл курашчиси, Шоҳмурод Шомуродов ва Мубинабону Каримова йилнинг умидли ёш курашчилари сифатида эътироф этилди.

Йилнинг энг яхши мураббийлари номига мамлакат терма жамоаси бош мураббийи Ризамат Солиев ва шогирдлари Ўзбекистон чемпионатлари ва кубокларида,  жаҳон ва қитъа чемпионатларида шода-шода медалларни қўлга киритган маҳоратли мураббий Манзура Турсунова сазовор бўлди.

Малакали кураш ҳакамлари Гулмира Исматова ва Искандар Мухамматов йил ҳакамлари сифатида талқин этилган жараёнда, республика чемпионатларини юқори савияда ташкил этганлиги, мамлакатимизда биринчи кураш маҳорат мактаби фаолиятини йўлга қўйганлиги учун Хоразм вилояти кураш федерацияси йилнинг энг фаол ҳудудий федерацияси сифатида шарафланди.