Кураш бўйича катталар ўртасидаги XV Осиё чемпионати манзили ва санаси маълум

Шу йилнинг 11-15 июнь кунлари Тожикистон Республикаси пойтахти Душанбеда кураш бўйича катталар ўртасидаги XV Осиё чемпионати бўлиб ўтади. Беллашувлар "Dushanbe Tennis Palace and Water Sport Complex" мажмуасида ташкил этилади.

Чемпионатда 17 ёшдан юқори бўлган спортчилар иштирок этиши мумкин. Ҳар бир мамлакат ҳар бир вазн тоифасида биттадан спортчи билан қатнашади. Барча иштирокчилар ўз давлати фуқароси бўлиши шарт. Шунингдек, IKA рухсати асосида Қочқинлар жамоасининг иштирокига ҳам йўл қўйилади.

Анъанага мувофиқ, чемпионат доирасида IKA халқаро ҳакамлар семинари, 1-2 юлдузли ҳакамлик имтиҳонлари, шунингдек, Осиё Кураш конфедерацияси Конгресси ва бошқарув қўмитаси йиғилиши ўтказилиши режалаштирилган.

Маълумот учун, Душанбе шаҳри 2022 йилда ҳам кураш бўйича катталар ўртасидаги Осиё чемпионатига мезбонлик қилган. Мазкур мусобақа юқори ташкилий савияда ўтказилгани учун Халқаро Кураш ассоциацияси томонидан “йилнинг энг яхши мусобақаси” сифатида эътироф этилган эди.