Кураш: Ўзбекистон кубоги мезбонларга насиб этди

Қизғин ва муросасиз кечган баҳслар юқори савияда ва кўтаринки руҳда бўлиб ўтди. Унда Қорақалпоғистон Республикаси, барча вилоятлар ва Тошкент шаҳридан келган 300 нафарга яқин алп йигитлар ва барчиной қизлар ғолиблик учун ўзаро бел олишди.

Муросасиз кечган баҳслар финалига Самарқанд ва Бухоро вилояти жамоалари етиб келишди. «Ўз уйингда деворлар ҳам суяйди», деганларидек ҳал қилувчи баҳсда бухоролик полвонлар рақиблари бўлмиш Самарқанд вилояти жамоасини асло аяб ўтирмади ва 8:1 ҳисобида ғалаба қозониб, Ўзбекистон кубоги соҳибига айланишди. Бу билан улар қайсидир маънода ўтган йилги мағлубият учун реванш олишди, десак ҳам хато қилмаймиз.

Шунингдек, мусобақа доирасида шахсий биринчилик бўйича ҳам беллашувлар ўтказилиб, ғолиб ва совриндорлар аниқланди. Уч кун давом этган муросасиз беллашувлар якунига кўра, умумжамоа ҳисобида 1-ўринни Бухоро вилояти жамоаси қўлга киритган бўлса, шоҳсупанинг иккинчи поғонасини Самарқанд вилояти аъзолари банд этишди. Тошкент ҳамда Сурхондарё вилоятлари жамоалари эса 3-ўринга лойиқ кўрилди.

Таъкидлаш жоиз, спорт иродани тоблаш билан бир қаторда миллатларни бирлаштиради ва дўстлаштиради. Инсонни аниқ мақсад сари интилишга ундайди, қийинчиликларни бардош ва чидам билан енгиб ўтишга ўргатиб, ғалабага ишонч, ғурур ва ифтихор, ватанпарварлик туйғуларини шакллантиради. Миллий ғуруримиз бўлмиш курашда ҳам ана шу фазилатлар мужассам ва шуниси билан у янада қадрлидир.