18 янв 13:45
Янгиликлар
Спорт курашлари, Кураш
Курашчиларимиздан медаллар шодаси, Тошкентда Олимпиада лицензияси учун турнир ўтказилади
Озарбайжон пойтахти Боку шаҳрида спорт курашлари бўйича ёшлар ўртасида Мушвиг Исаев хотирасига бағишланган анъанавий халқаро турнир бўлиб ўтди.
Эътиборлиси, мусобақа Олимпия вазн тоифаларида ўтказилди.
Хабарингиз бор, жорий
йилнинг 6-18 октябрь кунлари Аргентина пойтахти Буэнос-Айресда III ёшлар
Олимпия ўйинлари бўлиб ўтади. Унга қадар барча қитъаларда ана шу
Олимпия ўйинлари учун лицензион мусобақалар ташкил этилади. Осиё
минтақасида Аргентинага йўлланма берувчи қитъа чемпионати мамлакатимиз
пойтахти Тошкентда шу йилнинг 10-13 май кунлари бўлиб ўтади.
Айтиш керакки, Бокудаги
халқаро турнир терма жамоамиз мураббийлар штаби учун айнан ману шу
муҳим мусобақа олдидан ёш полвонлар имкониятини чамалаб олиш, терма
жамоага муносиб номзодларни саралашда қўл келди. Мушвиг Исаев халқаро
хотира турнирида мезбонлардан ташқари Россия, Қозоғистон, Грузия ва
Ўзбекистон терма жамоалари иштирок этишди.
Мусобақа якунларига
кўра юнон-рум кураши бўйича баҳсларда гиламга чиққан ёш полвонларимиздан
Аброр Нурмуҳамедов олтин, Бекзод Аҳмедов кумуш, Муҳаммад Поёнов ва
Хусанхон Юнусхоновлар бронза медалларига сазовор бўлишди. Якунда
юнон-рум кураши бўйича терма жамоамиз умумжамоа ҳисобида 3-ўринни
эгаллади.
Эркин кураш бўйича
ташкил этилган беллашувларда эса терма жамоамиз аъзоларидан Умиджон
Жалолов ва Муҳаммадрасул Раҳимовлар олтин медални қўлга киритган
бўлсалар, Нодир Раҳимов кумуш, Зафарбек Отахонов эса бронза медалига эга
чиқишди. Ушбу натижалари эвазига эркин кураш бўйича терма жамоамиз
мусобақани умумжамоа ҳисобида иккинчи ўринда якунлади.
Май ойига қадар ёшлар
терма жамоамизни яна бир қатор халқаро турнирлар ва ўқув-машғулот
йиғинлари кутиб турибди. Улар орқали мураббийлар штаби Осиё чемпионатида
юртимиз шарафини ҳимоя қиладиган спортчиларни аниқлаб олишади.
Ҳавола :
Манба : olympic.uz
Фикрлар