Лаутаро болалиги ҳақида: "Ижарага пулимиз етмагани учун қарийб 3 йил отамнинг дўстиникида яшадик"

– Сиз бой оилада улғаймагансиз. Аргентинадаги болалигингиз қандай ўтган?

– Вазиятни тушунтиришга ҳаракат қиламан. Отам футболчи эди. У профессионал даражага чиқиб, В Серияга етганида, Баия-Бланкадаги ҳарбий-денгиз базасидаги авиамеханиклик ишини ташлаб кетган. Отам тўп тепадиган жамоа қуйи лигага тушиб кетгач, оилани боқиш учун пул етмай қолди. Шундан сўнг у кекса ёшдаги инсонларга қаровчи бўлиб ишлай бошлади, онам эса уй хизматчиси сифатида озгина пул топарди. Оилада учта фарзанд эдик ва уйда доим пул етишмовчилиги сезиларди.

– Егулик ҳам тез-тез тугаб турармиди?

– Тўғрисини айтсам, унчалик эмас. Акам ва укам билан ким кўпроқ ейиш бўйича мусобақа ўйнардик. Аммо кечки овқатни кутаётганда қорним очганини ҳис қилганим ҳалиям ёдимда. Бундан ташқари, ижара ҳақини тўлай олмасдик. Шу сабабли қарийб уч йил давомида отамнинг бир дўстиникида яшадик. У ерда вақти-вақти билан электр энергияси учун атиги 100 песо (ҳозирги курс бўйича тахминан 6 евроцент) тўлаб турардик, холос.

– Ўша даврлардан хотирангизда нималар қолган?

– Ўша кунларни эсласам, юзимга табассум югуради. Мен бахтли эдим, чин юракдан бахтли эдим. Мени ҳақиқий эркак сифатида шакллантирган ўша туйғуларни яна бир бор ҳис қилишни истардим. Ота-онам туфайли камтарлик ва ҳурмат нима эканлигини ўргандим, ҳозир эса бу фазилатларни ўз фарзандларимга сингдириб келяпман, - деди Лаутаро.