"Мағлубият таъмини татиб кўрмаган боксчи буюк бўла олмайди". Боксимиз юлдузлари Бектемирнинг мағлубиятига муносабат билдиришди

Раҳматжон Рўзиохунов - терма жамоа катта мураббийи: "Мағлубият ҳам ғалаба ҳам Аллоҳдан. Баъзида кучлилар ҳам шундай синовлардан ўтишига тўғри келади, сени нимага қодир эканлигингни биз яхши биламиз. Олдинда ИнШаОллоҳ чиройли ғалабалар кутяпти, ҳали бу мағлубият ютуқларинг соясида қолиб кетади".

Фарруҳ Қиличев - терма жамоа ёрдамчи мураббийи:

"Нима дейишга ҳам ҳайронман. Бу бокс-шундай. Ҳаммаси Аллоҳдан. Бектемирга соғлик тилаймиз. Ин Шаа Аллоҳ, ҳали ҳаммаси олдинда, у кучли эканлигини ҳаммага исботлайди . Бу бошқа боксчиларимизга дарс бўлиши керак. Ҳаддан ортиқ ўзига ишониш ҳам яхшиликка олиб келмайди. Инсон бирор нарсанинг ҳам яхши ҳам ёмон томони борлигини ўйлаши керак, деб ҳисоблайман".

Азиз Абдуғофуров - профессионал боксчи:

"Бектемир жангни яхши бошлади ҳама раундларни ютаётган эди. Боксда бундай ҳолатлар коп учрайди, битта зарба кўп нарсани ҳал қилади. Жангда бироз шошилди, ҳимояни унитди. Худо хоҳласа, кейинги жангларда Бектемир ўзини кўрсатади".

Қудратилло Абдуқаҳҳоров - профессионал боксчи:

"Ғалаба ҳам мағлубият ҳам Аллоҳдан. Бек жангни ютаётган эди. Буни барча кўрди. Ўзига ишонч катта бўлгани учун ҳимояни бироз ёддан чиқарди. Шу сабабли бу зарбани кўрмай қолди".

Иқболжон Холдаров - боксчи:

"Бу бокс ва унда ҳамма нарса бўлиши мумкин. Асосийси, синмаслик, ортга чекинмаслик. Ҳеч қачон мағлубият таъмини татиб кўрмаган боксчи буюк бўла олмайди. Ўйлайманки, Бектемирнинг мағлубияти янада кучли бўлиб қайтишига ёрдам беради. Ин Шаа Аллоҳ, кучли боксчиларни енгиб, жаҳон чемпиони бўлганида бугунги мағлубияти яхшиликка бўлганига амин бўлади".