Магнус Карлсен фикридан қайтди, у блиц жаҳон чемпионатида иштирок этади

Дресс-кодга риоя қилишни истамаган Магнус жаримага тортилганди. Карлсен FIDE`га ўзига хос бойкот сифатида жаҳон чемпионатидаги иштирокини давом эттирмаслигини маълум қилганди.  

Лекин у фикридан қайтди ва сўзини қайтариб олди. Рапидда чемпионликдан маҳрум бўлган норвегиялик шахматчи энди блицдаги жаҳон чемпионлик унвонини ҳимоя қилади. Бу ҳақда у “Take Take Take”га берган интервьюсида маълум қилди. Магнус FIDE президенти Аркадий Дворкович ва мусобақа бош ҳомийси Тимур Турлов билан суҳбатдан кейин фикрини ўзгартирган. 

"Мен камида бир кун ўйнайман. Агар ҳаммаси жойида бўлса, иккинчи кун ҳам қоламан. Ҳа, мен FIDE`га нисбатан кескин гапирдим. Лекин бу сўзлар бутун бошли ташкилотга эмас, у ердаги айрим инсонлар учун эди. Бу муаммони мен эмас, улар келтириб чиқаришди деб ўйлайман. Мен ҳатто Нью-Йоркни тарк этиш учун чипта ҳам олгандим. Аммо отам FIDE президенти билан гаплашиб кўришим кераклигини айтди. Дворкович билан муносабатларимиз ҳамиша яхши бўлган", - деди Карлсен.