Магомед Анкалаев бугунги ғалабасидан сўнг баёнот берди

"Ғалаба қозонганимдан хурсандман, аммо жанг бироз зерикарли бўлди. Эҳтиёткорлик қилдим, сабаби Сантос жуда кучли зарба йўллади, шунинг учун, жангимдан унчалик қониқмадим. Бошқа томондан олиб қараганда, бу жангда ўзимни синаб кўрдим — анчадан бери беш раунд жанг қилишни, бутун масофани ҳис қилишни хоҳлардим ва бугун бунга эришдим. 

Бу менинг илк катта жангим эди, масъулият катта эди. Мен яхши ҳаракат қилдим ва буни уддаладим. Ўйлашимча, энди биз катта чақирувларга тайёрмиз", - дея таъкидлаган россиялик жангчи турнир якунидаги матбуот анжуманида.

Анкалаев навбатдаги рақиби сифатида Гловер Тейшейра - Иржи Прохазка жуфтлиги ғолибини кўришни хоҳлаяпти. Лекин ташкилот раҳбарияти қарор қилса, у номзод жангини ҳам қабул қилишга тайёр.

"Албатта, титул учун жанг қилишни хоҳлайман, лекин бу UFC ва менежеримга боғлиқ. Титул учун жанг қилишга лойиқмиз деб умид қиламан. Яримоғир вазн тоифасида кетма-кет 8 ғалаба — бу жуда қийин. Бу ерда кучли жангчилар бор, ўйлайманки, мен титул учун жангга лойиқман. Умид қиламанки, UFC мени бундан айирмайди.

Агар титул учун жанг қилмасам, кейинги жангим номзодлар билан бўлади. Ушбу ҳолатда ҳар қандай чақирувни қабул қиламан", - дея сўзига якун ясади Анкалаев.

Эслатиб ўтамиз, Магомед Анкалаев бугун Лас-Вегасда бўлиб ўтган UFC Fight Night 203 турнирида титул учун собиқ даъвогар Тиаго Сантос билан жанг қилиб, очколар эвазига ғалаба қозонди.