Макгрегор - Порье оқшоми андеркард жангида Хабибнинг жамоадоши октагонга чиқади

UFC 257 турнирининг марказий жангида икки вазн тоифасида собиқ жаҳон чемпиони Конор Макгрегор лиганинг собиқ вақтинчалик чемпиони Дастин Порьега қарши октагонга кўтарилади.

Матчмейкерлар шоунинг асосий кардини қизиқарли жанглар билан тўлдиришда давом этишяпти. Хабарда айтилишича, андеркард жанг Хабиб Нурмагомедовнинг жамоадоши Тагир Уланбеков иштирокида ўтади. Унинг рақиби Матеус Николау Перейра бўлади.

Маълумот учун, Уланбеков UFC промоушенидаги дебютини шу йилнинг октябрь ойида ўтказиб, Бруно Силвани мағлубиятга учратган эди. Перейра эса икки йиллик танаффусдан сўнг октагонга қайтмоқда. У бунга қадар 2015–2018 йиллар оралиғида UFC`да 4 та жанг ўтказиб, уларнинг 3 тасида ғалаба қозонганди. 

Дарвоқе, ушбу турнирда Уланбековдан ташқари Хабибнинг жияни Умар Нурмагомедов ҳам иштирок этади. Умар асосий карддан ўрин олган жангда Сергей Морозов билан тўқнаш келади.