“Макларен” раҳбарияти Алонсо учун янги шартнома тайёрлаяпти

“Макларен” ижрочи директори Зак Брауннинг айтишича, яқин кунларда Алонсо билан янги шартнома имзоланади.

“Тез кунларда музокаралар бошланади. Фернандо билан узоқ муддат ҳамкорлик қилиш тарафдоримиз. Алонсо биз учун дунёнинг энг яхши пилоти”, — деди Браун.

Амалдаги жаҳон чемпиони Нико Росберг фаолиятини якунлагач, “Мерседес” жамоаси унинг ўрнига айнан Алонсони таклиф қилиш истагида юрибди. Шу боис ҳам, “Макларен” жамоаси отни илгарироқ қамчилаб қолмоқчи.