Макс Холлоуэй Ислам Махачевга қарши чемпионлик жанги учун тайёр!

Бу ҳақда америкалик жангчи ўзининг YouTube каналида эълон қилган видеода келгуси режалари ҳақида гапирар экан, маълум қилди.

"Кейин нима бўлади? Менга бу саволни доим беришади ва ростини айтсам, билмайман. Сизга ҳам ҳозир аниқ жавоб бера олмайман. Келажакда нима бўлишини билмайман. Конор мен ҳақимда гапираётганини, мени чақираётганини ва келаси йили жанг қилмоқчи эканини кўряпмиз. Мен тайёрман, лекин UFC нима истаётганини билмайман. Ҳар қандай ҳолатда ҳам мен шу ердаман ва айтилган пайт ҳамда жангга тайёр бўламан.

Агар келаси йили берилажак рақиб Конор бўлса – аъло! Агар бу қайсидир вазн тоифасида чемпионлик жанги бўлса – яна ҳам зўр! Мен ярим ўрта вазнга кўтарилдим. Ярим ўрта вазн чемпиони ёки унинг жамоаси менинг гапларимдан норози бўлибди, бу мени ҳайрон қолдирди, чунки мен ҳеч қандай ҳурматсизлик қилмагандим. Шунчаки кўпчилик ўйлаган нарсани овоз чиқариб айтдим. Энди мен ёмон одамманми? Лекин бўлар иш бўлди.

Бундан ташқари, агар имконият туғилса, енгил вазн чемпиони билан ўз тарихим бор ва биламанки, у ўша мағлубият учун мендан ўч олмоқчи. Шундай экан, агар менга ушбу вазн тоифаларининг исталган бирида чемпионлик жанги таклиф қилишса – мен тайёрман. Агар яна Конор Макгрегор билан жанг таклиф қилишса – шартномани имзолаш учун юборинг!, – деди Макс.

Эслатиб ўтамиз, жорий йилда Макс Холлоуэй иккита жанг ўтказди: март ойида енгил вазн тоифасида Чарльз Оливейрага қарши кечган баҳсда ҳакамларнинг якдил қарори билан мағлуб бўлиб, BMF камарини бой берди. Июль ойида эса ярим ўрта вазнда ўтказилган жангда Конор Макгрегор тиззасидан жароҳат олгани сабабли, Холлоуэй 69 сония ичида техник нокаут эвазига ғалаба қозонди.