Майами WTA 1000 турнири бош соврини ҳам "лимон" кимга насиб этди?

Мусобақа бош соврини беларуслик Арина Соболенкога насиб этди. Дунёнинг биринчи ракеткаси ҳал қилувчи финал учрашувида WTA рейтингида тўртинчи ўринни эгаллаб турган америкалик Коко Гоффга қарши кортга чиқди. Икки соату 11 дақиқа давом этган баҳсда Арина уч сет натижасига кўра ғалаба қозонди - 6/2, 4/6, 6/3.

Қизиғи, теннисчиларнинг ўзаро ўн биринчи учрашувидан кейин Соболенко ҳисобда олдинга чиқиб олди - 6:5. Арина баҳс давомида 3, Коко 5 та эйс зарбасини амалга оширган. Қўшхатолар бўйича америкалик мутлақ "устунлик" қилди - 7 га 0. Брейклар бўйича Арина 4 га 1 кўринишида устун келди.

Шу тариқа, Соболенко кетма-кет "Олтин дубль" қайд этди. У бундан аввалги Индиан-Уэллс турнирида ҳам чемпион бўлган эди. Беларуслик теннис маликаси мавсумдаги учинчи чемпионлик титулига эга чиқди. У мавсум аввалида Брисбен (Австралия) турнирида ҳам бош совринлик бўлганди.  

Майамидаги икки ҳафталик меҳнат Соболенкога 1 миллион 151 минг 380 АҚШ доллари миқдорида мукофот пули ҳамда 1000 WTA рейтинг очкосини келтирди. Гофф эса 650 рейтинг очкоси ҳамда 612 340 долларга эга бўлди.