МДҲ ўйинларида 9 давлат орасида 7-ўриндамиз, ҳозирча + ЖАДВАЛ

Мусобақанинг иккинчи кунги баҳсларидан сўнг Ўзбекистон спорт делегацияси ҳисобидаги медаллар сони роппа-роса 10 тага етди. Эркин курашчимиз Намоз Абдурашидов (125 кг) бронза медалига сазовор бўлди. Ярим финалда мағлубиятга учраган 4 нафар чарм қўлқоп устамиз бронза медаллари билан кифояланишди. Юнон-рум курашчиларимиз 2 та кумуш, 3 та бронза медалини қўлга киритишди. Ҳозирча 10 та медалга эга бўлиб турган Ўзбекистон спорт делегацияси МДҲ ўйинларида қатнашаётган 9 давлат спорт делегациялари орасида 7-ўринни эгаллаб турибди. Бугун 7 нафар боксчимизнинг финалда рингга кўтарилишини инобатга олсак, жадвалда яна кўтарилиш имкониятимиз юқори экани ойдинлашади.    

Айни шу дақиқаларда Россия терма жамоаси медаллар жамғариш бўйича катта фарқ билан пешқадамлик қиляпти. Мезбонлар 21 та олтин, 6 та кумуш, 6 та бронза, жами 33 та медални қўлга киритиб улгуришган. Озарбайжон 6 та олтин, 4 та кумуш, 11 та бронза медали билан иккинчи ўринни банд этган. Иккита олтин, 6 та кумуш, 6 та бронза медалига эга Беларусь делегацияси кучли учликка якун ясаган. Биздан аввалги ўринларни Қирғизистон ва Қозоғистон терма жамоалари эгаллашган. Қозоғистоннинг умумий 28 та медалидан 23 таси бронза эканлиги диққатга сазовор.