Медведев Энди Маррейни мағлуб этиб, Доҳа турнири ғолибига айланди

Ҳал қилувчи финалда жаҳоннинг 8-ракеткаси, россиялик Даниил Медведев ва айни пайтда АТР рейтингида 70-поғонани эгаллаб турган британиялик Энди Маррей тўқнаш келди. Учрашув "Халифа халқаро теннис мажмуаси"нинг марказий кортида бўлиб ўтди.

Бир соату 47 дақиқа давом этган учрашувда Медведев Маррейни 6:4, 6:4 ҳисобида мағлуб этиб, турнир бош совринига эга чиқди. Учрашув давомида Даниил 6 та эйс, 6 та қўшхато ва 4 та брейк қайд этди. 

Энди эса 1 та эйс зарбасини амалга ошириб, тўпни ўйинга киритишда 1 бор хатога йўл қўйди ҳамда 4 та брейкнинг 2 тасидан унумли фойдаланди. Шу тариқа, россиялик теннисчининг Маррей устидан қозонган ғалабалари сони 3 тага етди (3:0). Маррей эса ҳали бирор марта Медведевни мағлуб этолмаган. 

Даниил Медведев ушбу ғалаба орқали 250 рейтинг очкосидан ташқари 209 минг долларга ҳам эга бўлди. Маррей эса ўз навбатида 150 очко ва 122 минг доллар мукофот пули ишлаб олди.