"Мен 100% қафасдаги жанг тарафдориман". Жо Байденнинг ўғли Трампнинг ўғилларига "вызов" ташлади

"Салом, йигитлар, мен Хантер Байденман. Менга ҳозиргина Эндрю Каллахан қўнғироқ қилди - у мени ой охирида Channel 5 Carnival турига қўшилишга таклиф қилди. Ўйлашимча, Фениксда бошлаймиз, кейин Сан-Диегога борамиз ва Альбукеркда тугатамиз. У қафасда жанг уюштиришга уринаётганга ўхшайди - мен Эрик ва кичик Дональдга қарши.

Мен унга розиман, дедим. Агар у буни уддалай олса, мен 100 фоиз розиман. Бўлмаса, барибир келаман. Ўйлашимча, у ҳали кўп кутилмаган янгиликларни тайёрлаб қўйган. Бу қизиқарли бўлади ва сизни у ерда кўришга умид қиламан", - деди кичик Байден Х ижтимоий тармоғида Channel 5 учун эълон қилинган видеода.

Ташаббускор америкалик режиссёр ва контентмейкер Эндрю Каллаган эди. У USA TODAY нашрига Байден буни ҳазил тариқасида айтганини тасдиқлади, бироқ агар ака-ука Трамплар Хантер билан ўзаро жангга киришга тайёр бўлса, уни ташкил этишда "кўпроқ ёрдам беришга тайёр" эканини қўшимча қилди. Кичик Дональд Трамп ва Эрик Трамп ҳозирча чақириққа жавоб бермади.