Мэйвезер - Пакьяо реванш жангининг ўтказилиш манзили ва муддати ўзгариши мумкин

Ҳозирда иккита вариант кўриб чиқилмоқда - T-Mobile Arena ёки MGM Grand Garden Arena. Бу ҳақда BoxingScene нашри хабар берди.

Агентлик маълумотларига кўра, бунинг сабаби логистика ва тижорат: The Sphere аренаси казинога боғланмаган, бу эса бундай йирик тадбирни ўтказиш учун камроқ фойда келтиради.

Эслатиб ўтамиз, ҳар учала арена ҳам деярли бир хил сиғимга эга: Sphere - 17 600, MGM Grand - 16 800, T-Mobile - 18 000 ўриндиқ. Бокс жанглари ўтказилаётганда, ринг атрофида қўшимча қаторлар ўрнатиш ҳисобига стандарт жойлар сони кўпайтирилиши мумкин.

Шунингдек, ҳозирда Пакьяо - Мэйвезер жангини 19 сентябрдан август ойининг ўрталарига кўчириш масаласи кўриб чиқилмоқда. Чунки 19 сентябрь куни Т-Моbile аренасида бошқа тадбир ўтказилиши режалаштирилган.

Маълумот учун, Мэнни Пакьяо ва Флойд Мэйвезер ўртасидаги илк жанг 2015 йилнинг май ойида АҚШнинг Лас-Вегас шаҳрида бўлиб ўтган эди. Ўшанда Флойд ҳакамларнинг якдил қарори билан ғалаба қозонганди.