"Милан" ҳимоячисини 100 млн еврога сотишга тайёр

Мавсум оралиғида "Милан" етакчиларидан бири, ҳимоячи Тео Эрнандеснинг келажаги ҳал бўлиши керак. Бу ҳақда "La Gazetta dello Sport" хабар бермоқда.

Томонлар 2026 йилнинг июнигача амал қиладиган шартномани узайтириш вариантини кўриб чиқмоқда. Футболчи маоши сезиларли даражада ошишига умид қилмоқда.

Ҳозир франциялик футболчи йилига 4,5 млн евро олади. У маоши вингер Рафаэл Леауники билан бир хил бўлишини истамоқда. Португалиялик бонусларни ҳисобга олган ҳолда йилига 7 млн евро маош олади.

Агар томонлар шартномани узайтириш борасида келиша олмаса, "россонерилар" Эрнандесни трансферга қўйишади. Бу ҳолатда "қизил-қоралар" футболчи учун 100 млн евро талаб қилишади.

26 ёшли ҳимоячи ўтган мавсум барча турнирларда 46 та ўйин ўтказиб, 5 та гол урди ва 11 та голли пас узатди. Унга "Реал" ва "Бавария" клублари қизиқиш билдирмоқда.