Misfits Boxing Тони Фергюсоннинг жангини тасдиқлади + ПОСТЕР

Америкалик собиқ UFC жангчиси 20 декабрь куни БААнинг Дубай шаҳрида ташкил этиладиган турнирда ўз камарини ҳимоя қилади. Тонининг рақиби британиялик Уоррен Спенсер бўлади.

41 ёшли Тони Фергюсон август ойида "Misfits Boxing" лигаси вақтинчалик чемпионлик камари учун кечган жангда блогер Натаниэл "Solt Papi" Бустамантени учинчи раундда техник нокаутга учратиб, боксдаги дебютини муваффақиятли ўтказганди. Ўша жанг америкаликнинг ўтган йилнинг ёзида UFC’ни тарк этганидан кейинги илк чиқиши бўлганди.

32 ёшли Уоррен Спенсер яккакурашга кириб келган блогердир. Унинг кўргазмали жанглардаги рекорди битта ғалаба ва иккита мағлубиятдан иборат. Профессионал боксда битта ғалабага эришган. У август ойида Диллон Денисга қарши MMA жангига чиққани ва 15 сониядан сўнг гилотинага тушиб, таслим бўлган.

Аввалроқ Тони "Эл Кукуя" Фергюсоннинг навбатдаги рақиби ўрта вазн тоифасида амалдаги Misfits Boxing чемпиони, ижтимоий тармоқда "AnEsonGib" номи билан танилган Али Ал-Фахри бўлиши, жанг бирлаштирувчи мақомда ўтказилиши тахмин қилинган эди, аммо Лига бу режани амалга ошира олмади.