Monterrey Open. "Ўзбекча финал"да бироз кутилмаган натижа қайд этилди

Хабар берганимиздек, Monterrey Open — WTA 500 турнирининг саралаш босқичи ҳал қилувчи финал учрашувига Ўзбекистоннинг биринчи хамда иккинчи ракеткалари - Камилла Раҳимова ва Мария Тимофеева етиб келганди. Уларнинг ҳар иккиси саралашнинг 1/2 финалида рақибаларини уч сет натижасига кўра мағлуб этишган эди.

Асосий тўр чиптаси учун кечган уларнинг ўзаро финал учрашуви ҳам уч сет давом этди. Биринчи сет 6/3 ҳисобида Раҳимова фойдасига ҳал бўлди. Иккинчи сетда худди шу ҳисобда Тимофеева ғалаба қозонди. Ҳал қилувчи учинчи сет ғолиби тай-брекда аниқланди. Унда Мария зафар қучиб, турнирнинг асосий тўрига йўлланмани қўлга киритди - 7/6(1). 

Бу теннисчиларимизнинг ўзаро ўтказган учинчи учрашуви бўлди - 2:1. Тимофеева илк бор Раҳимовани таслим этди. Икки соату 52 дақиқа давом этган баҳсда Мария 4, Камилла 1 та эйс зарбасини амалга оширди. Қўшхатолар саралаш турнирида олтинчи рақам остида ҳаракат қилган Раҳимовада кўпроқ бўлди - 9 га 6.   

Таққослаш учун, Мария Тимофеева айни пайтда WTA рейтингида 96, Камилла Раҳимова эса 83-ўринни эгаллаб турибди.