МОҚ қабул имтихонларини жиддий назоратга олади

Унда Ўзбекистон Миллий олимпия қўмитаси Бош котиби Жасур Матчанов, Ўзбекистон Жисмоний тарбия ва спорт вазирлиги бошқарма бошлиғи Назиржон Худойқуловлар иштирок этишди. Тадбирда Тошкент вилояти прокурори ўринбосари ҳамда Чирчиқ шаҳар прокурори ҳам қатнашишди. 

Маълумки, айни пайтда республикамиздаги олий таълим муассасаларига ўқув йили якунига етиб бормоқда ва қабул жараёнларига тайёргарлик қизғин паллага кирган. Анжуманнинг айни шу пайтда ташкил этилганида ҳам ўзига яраша мантиқ бор. Зеро, Миллий олимпия қўмитаси юритаётган сиёсатга кўра спорт ўқув юртларига қабул жараёнлари шаффофлик ва ҳолислик билан ўтиши, турли ноҳақликлардан ҳоли бўлиши лозим. Учрашувда ана шу масалалар юзасидан фикр алмашилди, тушунтиришлар берилди. 

Тадбирда қатнашган МОҚ Бош котиб Жасур Матчанов ҳам Жисмоний тарбия ва спорт университети, Олимпия захиралари спорт коллежларида бу йилги қабул жараёнларини шаффофлик билан ташкил этиш, турли қинғирликларга йўл қўйилмаслиги учун Миллий олимпия қўмитаси томонидан керакли ишлар амалга оширилишини қайд этиб ўтди. Унга кўра МОҚ, вазирлик ва спорт федерациялари масъул ходимлари қабул жараёнларида бевосита иштирок этадилар. Бу ҳам албатта қабул жараёнида шаффофликни таъминлаш, маълум даражада коррупцияни олдини олиш имконини беради. 

Йиғилишдан сўнг шу ернинг ўзида университетнинг кафедра мудирлари, масъул ходимлари билан алоҳида гаплашиб олинди. Қабул жараёнида йўл қўйиладиган ноҳақликлар кечирилмаслиги уқтирилди. Бу борада юзага келган турли ҳолатлар мисол тариқасида келтириб ўтилди. 

Ўз навбатида ҳалол ва сидқидилдан фаолият кўрсатаётган устозларни рағбатлантириш мақсадида, давлатимиз раҳбарининг топшириғига асосан Молия вазирлиги билан ҳамкорликда профессор-ўқитувчилар ва илмий-ходимлар маошларининг оширилиши бўйича Вазирлар Маҳкамасига қарор лойиҳаси тайёрланаётганлиги маълум қилинди.