01 июн 11:26
Янгиликлар

Теннис

Мугуруса Свитолинанинг 1/8 финалга чиқишига йўл қўймади

Франция пойтахти Париж шаҳрида “Катта Дубулға” туркумига кирувчи “Ролан Гаррос” турнири давом этмоқда.

Испаниялик теннисчи Гарбинье Мугуруса турнирнинг 1/8 финалига чиқди. Дунёнинг 19-ракеткаси учинчи давра учрашувида рейтингнинг 9-поғонасидан жой олган украиналик Элина Свитолинага қарши кортга чиқди.

Бир соату 28 дақиқа давом этган баҳсда Мугуруса номдор рақибасини 6:3, 6:3 ҳисобида таслим этди. Энди Гарбинье Франция Очиқ чемпионатининг чорак финалига чиқиш учун америкалик Слоан Стивенс ҳамда словениялик Полона Херцог учрашуви ғолиби билан ҳисоб-китоб қилади.